De Afstammung
Fredi Preuß - Altkalen
Bi´n Bürgermeister süll ne Bespräkung wesen.
Dor an dei Dör dor wier´t tau läsen.
Drei Mann wiern ierst tausamen,
dei Annern würd´n woll späder kamen.
Herr Bürgermeister wier all dor
un grawwelt sick in sien dünnen Hoor.
Von Beruf wier hei Steinschläger wäsen,
man künn em dat von´t Gesicht afläsen.
Doch mit dat olle Schrieben un Läsen
dor wull dat nich so recht mit wäsen.
Doch mit ein Deil makt hei alles wett,
hei lög glatt dörch nen eiken Brett.
Letzt har hei einen Breif mal schräwen
denn würd hei ierst sien Schriefkraft gäwen.
Dei meckert denn jo ok glieck los:
"Ne Herr Bürgermeister so geiht nich los.
´Herrr´ wart grot und mit twei R doch schräwen,
ne so wat ded ick noch nich beläwen."
"Jä," säd uns Bürgermeister denn
un schulte dunn so vör sick henn,
“dat her dat hew ich richtig liehrt,
dat schriew ick hüt noch nich verkiehrt.
Dit bruk ick hüt up Schritt un Tritt.
Wie oft möt ick seggen: `Her dormit`.”
So wull hei hüt nu Indruck schinnen
un füng jo denn glieck an tau spinnen.
“Un hoge Schaul hew ick grad besöcht,
dor makten sei mi richtig trecht.
Dor künn wat liern, ji künnt beläwen.”
Doch is nich väl von sitten bläwen.
“Ja”, säd de Möller, “mit dese Schaulen is dat arg,
dei lingen denn woll all baben up denn Barg.”
Dor wier denn noch son klauken Mann,
man seg em glatt denn Liehrer an.
Em ded ja nu dei Hawer stäken
un würd ja denn nu wieder spräken.
Hei wüßt jo alles ganz genau,
wat wier dei Kierl blos einmal schlau.
“Der Mensch ist das Produkt seiner Umwelt und Erziehung”,
würd hei mit Nadruck seggen
un würd sien Gesicht in Falten leggen.
Dei Möller äwer kek em ann,
hier wull hei doch nich richtig ran:
“Dei Hauptsak hest du doch vergätten
denn jeder Minsch, ob swart, ob witt
krigt von dei Öllern noch wat mit.”
“Ne”, säd dei Liehrer, “nähmt juch man tausamen,
de nige Wissenschaft is tau anner Erkenntnisse kamen.
Dei Minschen stammen von Apen aff,
ja, dor daut ji staunen, dor sünd ji baff.”
“Ja”, säd dei Möller un nehm sick tausamen,
“ick bin nun ok tau dei Erkenntnis kamen.
Ick kek mi di mal richtig an.
Ja, an dei Erkenntnis dor schlut ick mi an.
Denn in dien Gesicht, süh mal ein,
dor is dei Verwandtschaft noch siehr gaut tau seihn.