Dat is all so as´t Ledder is
Karl-Friedrich Lenz
(2014)
"Dat is all so as´t Ledder is", säh Jochen Nüßler un set up de Obenbänk un smökt up de Piep, as wenn ein lütt Mann backt. "Wat sall de Minsch bi daun?"
Kieken wie eis nah Niegenkalen, wat dor so passiert ist. Nähmen wie uns eis dat Stadtfest vör. Dat dat Wärer mies wier, dorför kann kein ein wat. De Draht na Petrus möt ierst lecht war. Äwer dat Fautballspäl, dat wier wat. Dat is ne Revolution bi de Fautballer. Dor brukt nur ne Kapell as Begleitung tau spälen, un gliecks geit dat im Walzerschritt öwer den Rasen. Dat is preisverdächtig.
Orrer de Böm. de in de Strat der Frünschaft plant warn süllen. De Gedanke wier gaud. Nauch Böm sind bestellt wor. As de Plantakschon losgüng, wier Pleiten, Pech un Pannen. Ein Bom wür genau unner ne Stratenlücht sett. Wat nu? Lamp versetten orrer den Bom. Man einigte sik up den Bom. Dat wier billiger. Nu güng dat wierer. Löcker wurn utpurrt un de nächst Öwerraschung wier dor. Man bröchte sier väl Bauschutt an´t Licht. Dat güng ja noch, äwer dat Argerliche wier, dat dor, wo de Böm stahn süllen, elektrische Leitungen lang lepen. Wecker het hier bi de Planung slopen, orrer wür öwerhaupt nich plant? Wie sünd ja miteis so gegen de Planwirtschaft. Wat dorbie rutkümmt, süht man allenthalben. De Böm, de keinen Platz an de Strat funn, kemen up den Sportplatz un up den Reuterplatz.
Wenn wat bucht ward, möt man de DIN inhollen, koste es wat es wolle. De Minsch het dat Nahsein. De Börgerstieg up dat letzt Enn von de Strat is so smal worn, dat twei Minschen nich aneinanner vörbie kamen. De Rasenstriepen is DIN - gerecht bucht worn. Dor fröcht man sick, wo blifft de Minsch?
Noch ein Argernis is de Wilhelm-Pieck-Strat. Nich, dat dor wat mokt ward, sondern wie. Het de Firma nur twei Arbeitslüd, de de Burdstein un Gossenstein setten könn? Mit vier Mann wiern se nur half so lang bi. De Tiet ward ümmer körter, je mier Buarbeiter doran wrangen. De Bär het ne Stell an´n Lief, wo dat siehr düster is. Genau so is dat in de Wilhelm-Pieck-Strat. Man tast sick dörch, as wenn man kein Och im Kopp het. Wat seggen hier de Vörschriften?
Dat hürt sick nu allns an, as ob ick nur tau meckern hef. Dat is nich so. Väle Soken sünd in Angriff nohm un de sünd all gaud un richtig. Niegenkalen hett sick rutermokt un gifft ein orriget Bild af. Dat hier un dor noch wat tau moken is, süht jeder. Rom wür ok nich an einen Dach buucht, Väle Soken sünd noch geplant un de warn ok mit de Tiet farig, un dat is gaud!